O‘zbekiston va Janubiy Koreya statistika idoralari o‘rtasida statistika sohasidagi hamkorlikni yanada kengaytirish va ikki tomonlama masalalar bo‘yicha tajriba almashish doirasida 2025-yil 6-fevral kuni videokonferensaloqa shaklida uchrashuv bo‘lib o‘tdi.
Ma’lumot uchun: Koreya statistika boshqarmasi “Statistics Korea” va O‘zbekiston Respublikasi Prezidenti huzuridagi Statistika agentligi o‘rtasidagi hamkorlik 2011-yil 24-avgustda Toshkent shahrida O‘zbekiston Respublikasi Davlat statistika qo‘mitasi bilan Koreya statistika boshqarmasi “Statistics Korea” o‘rtasida statistika sohasida o‘zaro anglashuv memorandumi imzolanganidan so‘ng rivojlana boshlagan.
Eslatib o‘tamiz, “Statistics Korea” delegatsiyasi tashrifi davomida 2023-yil 15-19-may kunlari uch tomonlama hamkorlik memorandumi imzolangan edi.Bu memorandum Statistika agentligining Kadrlar malakasini oshirish va statistik tadqiqotlar instituti, Statistika trening instituti hamda Koreya statistika boshqarmasining “Statistics Korea” statistika tadqiqotlari instituti o‘rtasida tuzildi.
Uchrashuvning asosiy maqsadi Koreya Respublikasining taraqqiyotga rasmiy yordam granti doirasida moliyalashtiriladigan “Statistika sohasida kadrlar salohiyatini oshirish” loyihasini muhokama qilishdan iborat edi.
Loyiha statistika tizimida kadrlar salohiyatini oshirish, integratsiyalashgan maʼmuriy boshqaruv tizimini yaratish, elektron taʼlim tizimini yaratish, mutaxassislarni qayta tayyorlash boʻyicha turli o‘quv kurslar oʻtkazish kabi chora-tadbirlarni amalga oshiriga qaratilgan.
Loyiha 2025–2028- yillarda Koreya tomonining grant mablag‘lari hisobidan amalga oshiriladi.
Uchrashuvda Statistika Agentligi vakillari va O‘zbekiston Respublikasi Prezidenti huzuridagi Statistika Agentligining Kadrlar malakasini oshirish va statistik tadqiqotlar instituti mutaxassislari Koreya Statistika boshqarmasi “Statistics Korea” vakillari bilan ushbu loyihani amalga oshirish bo‘yicha istiqbolli yo‘nalishlar va joriy rejalar muhokama qilindi.