O‘zbekiston Respublikasi Vazirlar Mahkamasining 2020-yil 11-noyabrdagi 710-son qarori ijrosini ta’minlash maqsadida Toshkent viloyatining barcha tuman va shaharlarida mavjud raqamsiz uylarni raqamlash va nom belgilari o‘rnatilmagan ko‘chalarga nom belgilarini o‘rnatish ishlari amalga oshirilmoqda.
Viloyatning olis tog‘li hududlarida joylashgan mahallalarda ham mazkur vazifalarni mutasaddi tashkilotlar tomonidan qay darajada bajarilishi Toshkent viloyati statistika boshqarmasi xodimlari tomonidan o‘rganilmoqda.
Jumladan, viloyatning eng olis hududlaridan biri bo‘lgan Bo‘stonliq tumanidagi Pskom mahallasida o‘rganish o‘tkazilib, mahallaning 3 ta ko‘chasida nom belgilari o‘rnatilmaganligi va 152 ta turar-joylar raqamlanmaganligi aniqlangan.
Aniqlangan holatlar mahalla raisi va mutasaddi tashkilotlar tomonidan qisqa muddatda hal etilib, raqamlanmagan turar joylarning to‘liq raqamlanishi va ko‘chalarga nom belgilarini o‘rnatilishi ta’minlandi.